Кейбір мобильді аударымдардың шегі 255 мың теңгеден 1 млн теңгеге дейін ұлғайтылады. Бұл туралы LS-ке Мемлекеттік кірістер комитетінен хабарлады.
Қаржы министрлігі Ұлттық банкпен және екінші деңгейлі банктермен бірге қолданыстағы критерийлерді үш ай ішінде 12 ең төменгі жалақы (ЕТЖ) (1,02 млн теңге) астам мобильді аударымдар сомасымен толықтыру туралы шешім қабылдады.
"Осылайша, критерийдің келесі редакциясы ұсынылады: "Бір физикалық тұлғаға бір ай ішінде 100-ден астам әр түрлі адамдардан үш ай қатарынан жалпы сомасы 12 ЕТЖ (2025 жылғы 1 қаңтарға 1 020 000 теңге) асатын қаражат түседі", — деді комитет өкілдері.
Аталған критерийлер қазір сенатта қаралуда. Олар жаңа Салық кодексінің аясында 2026 жылғы 1 қаңтардан бастап күшіне енеді деп күтілуде.
Осыған байланысты қаржы вице-министрі Даурен Кеңбейіл 1 млн теңге шегінің таңдалу себебін түсіндірді.
"Бұл шек үш ай бойы жинақталатын соманы білдіреді, яғни ай сайын шамамен 300 мың теңгені құрайды. Мемлекеттік кірістер комитетіндегі әріптестеріміз бұл соманы қауіпсіз деп танып, қазір осы мәселе бойынша талқылау жүргізілуде. Мен бұл шешімді дұрыс деп санаймын", — деді ол.
Вице-министрден салық органдары туыстарынан ай сайын аударымдар алатын азаматтарға сұрақтар қойыла ма деген сауал қойылды.
"Егер сіз кәсіпкерлікпен айналыспасаңыз, салық органдары тарапынан ешқандай сұрақ қойылмайды және түсіністікпен қаралады. 1 миллион теңге шегі тек белсенді түрде аударымдар жасайтын азаматтарға қатысты. Бұл шектеу жасырын кәсіпкерлерді анықтау үшін енгізіліп отыр. Сондықтан заң талаптарын сақтасаңыз, ешқандай қиындыққа тап болмайсыз", — деп түйіндеді Д. Кеңбейіл.
Бұған дейін, LS редакциясы жазғандай, келесі жылдан бастап Қазақстандағы мобильді аударымдар бақылауға алынады.
Сондай-ақ, Мемлекеттік кірістер комитеті бұл процедураның кезең-кезеңімен енгізілетінін еске салды. 2023-2024 жылдары тек мемлекеттік қызметкерлер, квазимемлекеттік сектор субъектілерінің қызметкерлері және олардың жұбайлары тексерілсе, биылдан бастап жеке кәсіпкерлер, заңды тұлға басшылары және олардың жұбайлары, ал халықтың қалған бөлігі 2026 жылдан кейін тексеріледі.
Қазіргі уақытта кәсіпкерлік табыс ретінде бір физикалық тұлғаға үш ай қатарынан, әр айда 100-ден астам түрлі адамдардан қаражат түсуі қарастырылады.
Айта кету керек, мұндай операцияларды бақылау үшін жаңа критерий – 12 ЕТЖ (1 млн теңгеден астам) аударым сомасы енгізілмек.
Бұл тәсіл 2026 жылдан бұрын енгізілмейді. Сонымен қатар, азаматтар жеке мақсатта (туыстарына, достарына, балаларына және т.б.) мобильді аударымдар жасай алады.
Кәсіпкерлік қызмет белгілері анықталған жағдайда Мемлекеттік кірістер органдары камеральдық бақылау жүргізеді. Қадағалау нәтижесінде бизнеске бұзушылықтарды жою үшін 30 жұмыс күні беріледі, бұл мерзім хабарлама берілген күннен кейін есептеледі.
Бақылау сомаларын 255 мың теңгеден 1,02 миллион теңгеге дейінгі ұлғайту туралы ақпаратты LS редакциясы биыл қыста жариялаған болатын. Сол кезде қаржы вице-министрі Ержан Біржанов бұл шешімнің Ұлттық банкпен бірлесіп қабылданғанын түсіндірді.
